يوميـات حمـاده


اهلا مره تانيه بس المره التانيه دى حتكون مختلفه حتكلم عن موضوع بيحصل اوى اوى اليومين دول , ممكن تبقى ماشى كده فى الشارع ولا بيك ولا عليك تلاقى ولد صغير لسه مكملش خمس ست سنين، عمال يعيط و لما تسأله مالك ,يرد يقول""" انا اتخنقت من مصر ونفسى اسافر بقى اروح اى حته ...اى حته مثلا امريكا ولا بريطانيا ولا حتى جنوب افريقيا بس المهم اخلع من مصر"""...؟؟؟


جنوب افريقيا يا حماده ...ما علينا


و لما تسأله ايه السبب تلاقى ،"""ممكن يكون علشان ابوه شخط فيه علشان شافه بيلعب بالكبريت"""...؟؟؟

سبب مقنع بجد يا حماده انت فعلا عظيم، الولد يا جماعه عنده ست سنين وعايز بقى يشوف مستقبله،و بدل مايلعب بالكبريت يتطور و يلعب فى شيكاغو مع العصابات اللى هناك بالقنابل...؟؟؟

و يكبر حماده و ربنا كرمه وجاب مجموع كويس فى الابتدائيه ودخل الاعداديه و كمل ودخل الثانويه...بس الولد المره دى حبه للسفر كبر معاه وكره لمصر برضه كبر معاه

و لما ترجع و تسأل حماده ايه رايك فى مصر،يبتدى يطلع كل السلبيات الموجود و يسيب الايجابيات ... هو عنده حق ان السلبيات كتير حبتين ، بس دى مصر

و حماده عايز يسافر وخلاص مش عارف هو عايز يسافر ليه ، بس اهوه عايز يسافر وخلاص

ودخل حماده الكليه ، وبدل ما حماده يقعد زى بقيت اصحابه يذاكر و يكون ذكريات جميله مع اصحابه اللى معاه فى الكليه

يبتدى يدور ع اى حد يسفره ويخرجه من البلد الوحشه دى ...بس لانها مصر

و برضه ربنا كرمه و لقى ابن الحلال اللى حيسفره ويخرجه بره ...بس الراجل عايز من حماده مبلغ وقدره علشان حيسفره ع طريقته

طريقه سهله خالص ...من مصر البلد الوحشه،لحد ليبيا ومن هناك حيركب مركبه نص لبه ولا بلاش نص لبه خليها نص عمر

لحد ايطاليا ومن هناك حيركب لحد بلد الحريات حلم كل شاب زى حماده وهما كتير شويه...؟؟؟

ويحاول حماده يجيب الفلوس... المهم جاب حماده الفلوس بعد ما خلى ابوه وامه و اخواته الخمسه ع الحديده لو لسه الحديده موجوده

و يروح حماده لليبيا و اخير حيتحقق حلم الولد المكافح ده ويمشى بره مصر الوحشه، و راح حماده من غير ما يسلم ع اصحابه واهله ، اصله حيعمل عيله جديده لما يسافر حماده لامريكا...حيعمل عيله كووووول...؟؟؟

وسافر حماده بالمركبه النص عمر دى و لحد ليطاليا بس يخساره حماده معرفش اللى فيها انه متهرب ومش معاه تصريح بالسفر

و اتمسك حماده و اللى معاه برضه كانوا عايزين يمشوا من البلد الوحشه اللى اسمها مصر

و طبعا طبعا الراجل الطيب ابن الحلال اللى كان حيسفر حماده ...اختفى """ اصله متعود ع كده ...الراجل طلع ابن حلال مع نص البلد وسفرهم بنفس الطريقه ،،بس الظاهر كده والله اعلم ان حماده هو اللى نحس ...؟؟؟


مش حقول ايه اللى حصل لحماده كل واحد يحط نهايه للولد ده اللى طالع من صغره مش بيحب مصر لانها مصر


هو اكيد اكيد ان العيب برضه مش ع حماده بس... العيب ع ابوه اللى مكلمهوش عن مصر وعرفه يعنى ايه معنى الوطن


انا عن نفسى شايف ان مصر مش رئيس الوزاره ولا حتى الريس بتاعنا

مصر هى اصحابك واهلك ، مصرهى الكورنيش اللى بتمشى عليه لما بتكون مخنوق ، مصر هى لما بتكون محتاج تلاقى الف ايد بتمدلك ايديها..... كفايه انها مصر بلدى اللى عشت و ذكرياتى فيها

هى صحيح مصر فيها سليبات كتير بس مش معنى كده اننا نسيبها ونسافر بره

المهم ان طلع من الموضوع ده ان الاساس هى التربيه


هو اكيد ان انا لسه موصلتش لحد نهائى نحل بيها المشكله دى...بس ع الاقل قولتها


مصر هى حبيبتى ... وانت بتحبها ولا لسه زى حماده...؟؟؟





كتب لكم / واحد مخه لاسع شويه
  • Digg
  • Del.icio.us
  • StumbleUpon
  • Reddit
  • Twitter
  • RSS

8 Response to "يوميـات حمـاده"

  1. غير معرف Says:
    13‏/7‏/2007 2:59 م

    معلش انا مع حماده فى اللى هو عايزة بس مش معنى كدة انى موافق على السفر بالطريقة دى لا انا معاه لو كانت الطريقة مشروعة مش عايزة يسافر اديلة شغل وهو يشتغل اديلة عيشة حلوة وهو ميسفرش العيب مش فى مصر العيب فى اللى عايشين فيها.

  2. واحد مخه لاسع شويه Says:
    13‏/7‏/2007 8:16 م

    واضح انك من المتشائمين بس لو كل واحد عنده مشاكل ومش عارف يشتغل سافر يبقى بقى مين اللى حيفضل علشان يغير من البلدى دى، هى اكيد الحكايه صعبه وصعبه جدا كمان بس ده واجب علينا، و ده اللى خلانى اطرح المشكله لنلاقى حل لها، مش تعدى وخلاص

  3. غير معرف Says:
    13‏/7‏/2007 10:52 م

    انا شاب و مخلص كليه تجارة بقالى سنتين لغاية دلوقتى مفيش شغل قولى اعمل ايه وبتمنى فى فرصة سفر واول لما هلاقى هسافر

  4. واحد مخه لاسع شويه Says:
    14‏/7‏/2007 7:28 ص

    طب طالما انت زى ما بتقول لسه فى تانيه تجاره استنى لما تخلص دراستك ودور ع شغل و حاول تانى وتالت ، حكايه انت تسيب بلدك دى مش سهله ، و انت ممكن تفتح مكتب محاسبه مع انى عارف انها برضه صعبه بس حاول ، وربنا حيساعدك

  5. غير معرف Says:
    14‏/7‏/2007 2:40 م

    انا خلصت كليه تجارة من سنتين مش فى سنة تانية انا خلصتتتتتتتتتتتتتتتت ومش لاقى شغل

  6. ahmed bakry Says:
    15‏/7‏/2007 3:50 ص

    واللهي صدقت يا لاسع انا مجرب الحكاية دي بس مش في امريكا في لندن المهم سعات بيجي عليا اوقات بكون نفسي ارجع بأي طريقة ليه؟ أهلي بيوحشوني صحابي زيهم بكون نفسي ارجع امشي في شوارعنا واشوف جراني واهل منطقتي ......بس احب اقولك الناس برده عندها حق يعييني خلاص اتخنقت من الظلم في البلد وانت عارف لو كل مواطن جتله فرصة للسفر بره الشعب كلة هيطفش ... ربنا يرحمنا

  7. شباب اون لاين says:
    15‏/7‏/2007 6:35 ص

    انت خلصت تجاره خلاص ، بص انت مش لاقى شغل بنسبه 100/100 لو الحكايه كده يبقى من الواضح انها فرص، ع اساس لو انت فعلا حاطط انك تشتغل فى مصر،انا جاتلى كام شغلانه بس انا اللى مكنتش بنزل ، بس الحكايه الواضح انها فرص ، وحاول تخلق فرصه و امسك فيها ، و ايدنا بنحاول نلاقى حل

  8. devine says:
    5‏/8‏/2007 7:51 ص

    السلام عليكم.بس هو حمادة مش كان غايز يسيب مصر من فراغ .اكيد كان فى سبب.والسبب طيعا معروف.ان الدولة مش موفرة لشبابنا الفرص.عشان كدة دى مسئولية الدولة..وبردة الشباب لان الى عايز يشتغل ويحسن من بلدة و ما يسيبهاش و يمشى اكيد هيلاقى الى يساعدو لان مصر فعلا زى ما انت قولت هى اصحايك و اهلك والخ..وشكرا