التاج الجميل ده وصلنى انا واحد مخه لاسع شويه من هاجر زعبل من شهر واحد اللى فات هى اكيد حتقدر الظروف اللى خلته يتأخر كل ده
.
.
1- لو كان ينفع تختار عصر تعيش فيه هيبقي انهي؟ ومين الحاكم؟
.
- كنت عايز اعيش عصر بدايه الاسلام علشان اكون من اول المسلمين اللى دخلوه الحكم ده
الحاكم طبعا يكون الرسول صلى الله عليه و سلم
.
.
2- أول أولويه في حياتك؟
.- اكيد عندى كتير بس متهيألى مينفعش اقوله هنا و دلوقتى ... عذرأ
.
.
3- أكتر حاجه بتحبها في رمضان؟
.- احلى حاجه فى رمضان يا سلام رمضان كله بيبقى فيه روح كده جميله من اول ما بتصحى لحد ما بتفطر و و تتصلى التراويح و تتسحر و تنام
.الشهر كله بيبقى له احساس تانى غير كل الشهور التانيه
.
.
4- أوصف أجمل فطار ممكن تفطره؟
.
- لو فطار يكون على الكورنيش بتاع البحر عندنا و يكون فيه كل اصحابى والناس اللى مقبلتهاش من فتره
و ممكن اى حد يقعد عادى ياكل يعنى الدعوه مفتوحه ... بس مين اللى حيعمل الاكل ده كله؟؟؟
.
.
5- لو انت حاكم هتكون عادل؟ وهتعرف ازاي؟
.
- سؤال غريب شويه لان مصر مفيهاش غير حاكم واحد
بس لو انا حاكم و عادل اكيد الناس حتبقى مبسوطه و مش بتعمل اعتصامات كل شويه
و الحياه لذيذه هى دى الطريقه اللى حعرف بيها ... ياما حتصل بــ 0900 علشان اعرف
.
.6- مين أكتر اعلامي بتحبه؟
.
- يا فله شمعه منوره ... عمرو اديب
- و اجمل اعلاميه فى مصر ... منى الشاذلى
.
بس خلاص
.
.
7- لو ممكن شغلانه تانيه تختار ايه؟
.
- انا كنت بحلم انى اكون قرصان ... حاجه جميله بصراحه تروح كده بفلوكه و معاك سلاح على اى حدود و تهجم على سفينه كبيره
و تستعبط الحكومه و يدولك فلوس كتير و تفك و شوف مين حيجيبك فى عرض البحر
.
انا اختار قرصان ... حتى اسمها يخض كده
.
.
8- تاني بلد تحب تعيش فيه بعد مصر؟
.- تانى بلد تانى بلد اعيش فيه صعب متهيالى انى اعيش بره مصر
بس ممكن اسافر اليابان اقعد فتره كده هناك و ارجع ع طول
.
ياله ادونى التأشيره و تذاكر السفر
.
.
9- اوصف ترتيبات أجمل فرح ممكن تحضره؟
.- كنت بفكر كده لو يبقى داخل فيه نظام اللعب بالنور يعنى مثلا يجى وقت العريس و العروسه يدخلوه يقوموا يطفوا النور يخلوها عاتمه
و بعد شويه ينورا النور الناس تلاقى العريس و العروسه قدامهم .... ياااااااااااااع
.
انا قررت لما اتجوز انا حقعد ف البيت و العروسه تروح الفرح عادى و تبقى تحصلنى ع البيت ... بلا هــم
.
.
10- بتراعي كلام الناس والقيل والقال؟ وليه؟
.
- متشغلش بالك سيب اللى يقول يقول
انا حقعد اسمع بقى ده قال ايه و ده قال ايه
.كل واحد يقول اللى هو عايزه و انا حعمل اللى انا عايزه
.
.
11- صحيت من النوم لا موبايل ولا كمبيوتر ولا كاميرا ديجيتال ورجعنا لعصر الاحصنه والحمام الزاجل؟
.- نعم ياختى ... انتى اكيد بتهزرى بس لو ده حصل
حيبقى مممممممممممممممملل ايه للصبح
.
بس ممكن اروح اشترى حصانين ملاكى و حمامه زاجله و سيف اكيد مش حيعتبره سلاح ابيض و يتقبض عليا
.
.
12- السعاده هي ... ؟
.
- رضاه الله عنك
- امتلاك ما تريد
- وجود الحب
.
.13- عندك أمل؟ وأسبابك؟
.- طبعا لازم يكون فيه امل لان لو مات الامل اسودت الحياه امام صاحبها
.
الاسباب
.
علشان ربنا موجود
و انى بحب الحياه و مقتنع ان دائما فى جديد و فى طريقه للوصول للى انا عايزه
.
.
14- لما تحب تهرب من كل حاجه بتروح فين؟
.
- اكيد انتوا عرفين ... البحر موجود عندنا وانتوا لآ
.اروح كده انزل ع البحر واقعد كده و اتفرج عليه و اشوف الافق و اتخيل انى واصل لاخرها
كده يعنى و ساعات مع صحابى نهزر و نهييس ولا اكنى فى حاجه ف الدنيا
.
.15- امتي أخر مره أخدت فيها نفس وقلت ياااااه أنا كبرت؟
.
- ببساطه كل ما تظهر مشكله او حاجه مطلوب منى انى اعملها مكنتش بعملها انا و صغير
بس دى الدنيا لابد ان تستمر فى زياده العمر
.
.16- بتشرب سجاير ولا لا؟ وايه رأيك في الستات والرجاله اللي بيشربوا؟
.
- انا مش بدخن و بشيل حديد من اول يناير
- طبعا اللى بيشرب السجاير دى اكيد دماغهم فيها حاجه يعنى ايه فكره انى بدخل جوايا دخان و اطلعه ... ايه الفكره فى كده
بس اكيد فى كتير نفسهم يتخلصوه منها و مش عارفين
.
.17- بتعرف ايدك الشمال ازاي؟
.
- لا ايدى الشمال هى اللى تعرفنى انا مش بعرف حد
.
.
18- أكتر آله موسيقيه بتحبها؟
.
- الجيتار الاسبانى
- الكمان
- الفلوت بانواعه
.
.
19- ليه الزوق والنخوه اتعدموا؟
.
- الفقر و الحرمان احد الاسباب بس مش عند كل الناس
كل واحد بقى بيقول ياله نفسى ... و اللى بيلحق يعمل حاجه قبل غيره بيعملها
.
بس لاااااااااااااااااااااااااااااااا انا زوق زوق زوق الصراحه
.
.
20- ايه الحاجات اللي لو حصلت هتبقي سعيد؟
.
- انى اصحى كده من النوم الاقى الدنيا وقفت و الناس مش بتتحرك
انزل انا بقى اخد العربيات اللى عايزها و الفلوس اللى عايزها و الشقه اللى عايزها
و اخدهم و ارجع البيت انام تانى لانى اكيد حبقى صاحى من الصبح و تعبان من اللف طول اليوم
.
.
21- تحب أرض زراعيه ولا اجمد عربيات ولا كام عماره ولا فلوس في البنك؟
.
- فلوس فى البنك اكيد ليه بقى يا زكى انت
حاخد الفلوس اشترى ارض زراعيه و عربيه اللى عايزها والكام عماره اللى انتى بتقولى عليهم دول
.
.
22- تحب البحر ولا النيل؟
.- البحر لانه ملوش حدود
.
اما النيل له حدين زى الموس و الاسبوع فيه حد واحد بس
.
.
23- مركب ولا طياره؟
.
- طياره تحسى بمتعه الطياران و تتفرجى ع السحاب و لو عصفوره طايره جنبك ولا حاجه تسليها ف السكه
و بعدين دى لو وقعت ولا حاجه حتلحقى تجرى و تنطى منها
.
لكن المركب يعنى بوء بوء بوء بوء ع طول مفيهاش كلام
.
. 24- شخص مجنون ولا عاقل؟
.
- شخص عاقل طبعا متهيالى هى مش ناقصه جنان
.
.25- تقرا كتاب ولا تتفرج علي فيلم؟
.
- لا بصراحه انا مليش خلق للكتب و كده
.
فيلم كده حلو اتفرج عليه بس ياريت يكون فيلم اجنبى مش بتوع الاكشن ده
لان الافلام العربى معظمها زى الكتب بالظبط تقيله و رخمه
..
اهداء التاج
صاحبه مدونه The Girl in Wind
.
صاحبه مدونه بنوته لاسعه
.
و لاصحاب اول خمس تعليقات
يعنى اول خمس تعليقات حياخد التاج يا معلم
-------------------------
كان معكم من امام الكيبورد
واحد مخه لاسع شويه
شبــــ اون لاين ـــاب
الاسكندريه
--------------------------
