الهجره غير الشرعيه

بسم الله الرحمن الرحيم

اولا كل سنة وانتم طيبين ربنا يعود علينا وعليكم الايام بخير

ثانيا انا هكلمكم فى موضوع انتشر اوووى الايام دى هو الهجرة الغير شرعية

انا والله بحزن لما بشوف فى نشرة الاخبار الشباب اللى راجعين فى صندوق خشب ميتين

انا عايزة اسأل سؤال هو انتوا خلاص مفيش امل انكم تشتغلوا فى بلدكم

ماشى انا عارفة ان مفيش فرص شغل داانت لو هتفتح محل سجاير احسن من انك تسافر لبلد متعرفش فيها حد ومفيش فيها شغل

ولو وصلت اساسا الاغلب بيروح فى البحر

انت عارف انت بتعمل ايه؟

انت بتبع اهلك كل حاجة عندهم دهب والدتك ومراتك وارض والدك بتيتم اولادك وبترمل مراتك ووالدك ووالدتك بيحزنوا العمر كله

وبعد كده بيحصلوك ليه تعمل فى نفسك وفى اللى حوليك كده

على فكرة انا مش ضد السفرلا سافر بس طريقة صح وشرعية روح على شغل يعنى متسفرش من بلدك الا وانت معاك عقد عمل

وياسلام على اللى يقولك هات بس الباسبور والفلوس وانا هسفرك انت بتدفع كام 30 الف مثلا

طيب ياابن الناس متفتح بيهم مشروع فى بلدك بين اهلك والله مش كلام

بس فعلا لو حصلك حاجة 1000 جنبك لكن برة بتروح على وهم وده اساسا لو وصلت لهناك انت بتسافر بيقولولك هتسافر فى باخرة وتروح تلاقيها مركب صيدعليها 1000 واحد وهى بتشيل 3 او4 او حتى 10 وفى الاخر تغرق المركب

وانت تروح وتروح حياتك وتروح كل احلامك واحلام اللى تعرفهم

بيصعب عليا الاهل وهما بيبكواعلى اولادهم بجد الله يكون فى عونهم فكروا وسافروا بس على شغل اكيد مش وهم

انت لما بتوصل وده نادرا مش بتلاقى شغل ومش بتلاقى حتى تمن التذكره علشان ترجع بلدك تروح السفارة الحقونى سفرونى بتترحل وبترجع بخيبه امل اكبرمن اللى سفرت بيها

ياريت كل واحد يخلى باله من النصابين اللى هما هات بسبورك ومالكش دعوة حكم عقلك وشوف انت رايح على فين احسن يجى وقت تندم فى وقت مش هينفع فيه ندم

اخيرا ياريت ياحكومه تفوقوا بقى وتوفروا فرص عمل للشباب

شباب بكرة اللى هيبنوا لبكرة اتمنى يجى اليوم اللى اشوف فيه شبابنا احسن شباب يارب يجى اليوم ده قبل مااموت.
..........باربــــــــــــــــــــى
  • Digg
  • Del.icio.us
  • StumbleUpon
  • Reddit
  • Twitter
  • RSS

20 Response to "الهجره غير الشرعيه"

  1. Zanooba (Zeinab sab9n) says:
    ١٢‏/٩‏/٢٠٠٨، ١٢:٠٣ م

    هااي باربي عاملة إيه ؟ رمضان كريم و إنشاء الله :) بصي يا بنتي الناس عندنا وصلت لمرحلة بقوا بيدفعوا فلوس عشان يموتوا ...لا حول و لا قوة إلا بالله ....أما النظام فأنا مش معلقة عليه أمل لكن أنا بتكلم على الشباب العادي اللي زينا يعني فين الجمعيات أو مجموعات الدعم للشباب التعبان اللي عندنا إحنا بنسبلنا الحاجات دي موجودة للإدمان بس لكن المفروض تبقى موجودة لأي ناس عندهم هموم أو مشكلة مشتركة لأن متتصوريش إزاي لما الواحد بيفتح قلبه لناس عندها نفس مشكلته بيرتاح و بيطلع بحلول و أفكار جديدة ...عشان كده أنا نفسي في جمعيات في مصر تساعد الشعب المصري اللي بقى مكتئب و فاقد للأمل .....تحياتي :)
    السلام عليكم
    أختك زينب

  2. غير معرف Says:
    ١٢‏/٩‏/٢٠٠٨، ١٢:٠٨ م

    مفيش حاجه اسمها مفيش شغل هنا وعايز اسافر
    اللي هنعمله بره نعمله ف بلدنا احسن
    الشباب بس بقي كسلان مش قادر يدور ولا عايز يتعب!!
    وكأن الوظيفه هتيجي لحد عنده "شوبيك لوبيك لو معاك المصباح ابقي قابلني بقي"
    ويسافروا واصلا الغربه دي بهدله اذا كان اللواحد ممكن يكون مع اهله واصحابه ومعارفه ويحس انه غريب فما بالك عن الغربه..
    انا ضد فكرة الهجره

  3. غير معرف Says:
    ١٢‏/٩‏/٢٠٠٨، ٥:٥٠ م

    زينب شرفتينى انا معاكى فى موضوع الجمعيات ده بس هى فين ومش هتتعمل على فكرةانا بتمنى انها تتعمل زى جمعيات اطفال الشوارع والادمان بس ياريت

  4. غير معرف Says:
    ١٢‏/٩‏/٢٠٠٨، ٥:٥٢ م

    هاجر اهلا بيكى فى مدونتنا المتواضعة انتى متحامله اوى على الشباب كده ليه والله فى كتير بيدور ويقولوا فوتوا علينا بكرة وبكرة ده مش بيجى وايه يعنى لما يسافروا ماشى يعملوا مشروع فى بلدهم بس فقدوا الامل يعملوا ايه لازم يسافروا يشوفوا شغل برة

  5. غير معرف Says:
    ١٥‏/٩‏/٢٠٠٨، ١٢:٢٨ ص

    هاجر
    كان نفسى اسبلك تعليق بس طلع كلامه كتير
    قريبه هتلقيه فى بوست

    تحياتى ليكى وزرينا باستمرار

    joker

  6. dalia says:
    ١٧‏/٩‏/٢٠٠٨، ١١:٠٤ ص

    الحياة أصبحت صعبة جدا في مصر ، لا تعليم نافع ولا قانون نافع ولا صحة ولا أي حاجة ، الكلام سهل قوي بس الحقيقة أصعب بكتير ، في أصعب من الاب اللي بيشغل ابنه معاه علشان مش عارف يعيش في أصعب من الشاب اللي بيجد كل حاجة بالواسطة والمحسوبية ، الحالة النفسية بتخلي الواحد في مصر يقتل ابنه والابن يقتل امه مفيش عقل لان الحياة اصبحت زي ما قلت صعبة قوي ، طيب نعمل ايه الحل نسافر وخلاص أو نعمل حاجة غير تقليدية حد يقدر يقترحها؟

  7. حنين.. says:
    ١٧‏/٩‏/٢٠٠٨، ١٠:٣٤ م

    والله الناس بقت غلابه اوى
    هجره شرعيه ولا غير شرعيه
    انا سمعت الناس اللى سافروا
    كلامهم كان يبكى بدل الدموع دم
    كشك سجاير برده يا باربى
    طيب قولى مثال تانى
    دمتى بخير
    وكل سنه وانتى طويبه

  8. غير معرف Says:
    ١٨‏/٩‏/٢٠٠٨، ١:٥٨ ص

    حنين اهلا بيكى فى مدونتنا ماله كشك السجاير اهو شغل وفى بلده احسن مايسافر ويرجع ميلقيش حتى الكشك ده

  9. غير معرف Says:
    ١٨‏/٩‏/٢٠٠٨، ٢:٠٠ ص

    اهلا بيكى ياداليا الحاجة الغير تقليدية دى صعبة فى بلدك عمرها ماهتتعمل هو يدور ولو مفيش امل يبقى السفر احسن حل

  10. غير معرف Says:
    ١٨‏/٩‏/٢٠٠٨، ٣:٠٠ ص

    على فكره يا جماعه الحل بيسط جدا

    اللى تجيله فرصه كويسه للسفر يسافر ربنا يوفقه واللى شغال هنا ومستريح خليه واللى مش لاقى سفر ولا شغل هنا الحل الوحيد هو الصبر

    joker

  11. غير معرف Says:
    ١٨‏/٩‏/٢٠٠٨، ٧:٥١ م

    ماشى ياجوكر الصبر بس مين بقى بيصبر واللى اتخرج من 5سنين واكتر ومش لاقى شغل ده بقى يعمل ايه ده صبر بما فيه الكفاية

  12. moory-mero says:
    ١٩‏/٩‏/٢٠٠٨، ١٢:١٧ ص

    السلام عليكم ورحمة الله وبركاته

    ياه باربي بتتكلمي عن حاجه بتألمني بجد شباب زي الورد بيموت بدري في البحر بسبب انهم بينضحك عليهم بسبب موضوع السفر والاحلام والشغل ليه يسافروا ويتغربوا عن طريق الخطا مالها البلد موش عاجبنا حالها ما نحاول انحنا نغير ندور مرة واتنين وتلاته ولو في غير تخصصاتنا ونشتغل واللى موش نعرفه نتعلمه المهم موش نسافر الا لو كان كله سليم وصح موش نعمل طرق ملتوية ونحسر اهلنا وولادنا بجد حاجه صعبه اووووي

    تسلمي باربي وانا متابعه بقية الموضوعات عشان المدونة بجد لذيذة

    ميرسي ليكي يا قمر
    في رعاية الله

  13. son's egypt says:
    ١٩‏/٩‏/٢٠٠٨، ١٢:٥٥ ص

    السلام عليكم
    فعلا السفر بالطريقة ديه لا يقدم ولا ياخر
    اي واحد نفسه يسافر ويجرب ولكن مش بطريقه غير صحيحة

  14. غير معرف Says:
    ١٩‏/٩‏/٢٠٠٨، ٣:١٧ ص

    mero-moory
    كان نفسى اخش اكتبلك كومنتات كتير
    بس مش انا اللى معايا اليوزر
    انتى بجد شرفتينا وانشاء الله نكون احنا التلاته صحابك
    فى رعايه الله

    joker

  15. غير معرف Says:
    ١٩‏/٩‏/٢٠٠٨، ٣:٢١ ص

    son's egypt
    وعليكم السلام ورحمة الله وبركاته

    شرفت مدونتنا الغلبانه
    وهو السفر ولا بيقدم ولابياخر زى ما انت قولت
    بس حال البلد مش بيتقدم بس بيتاخر
    وكل واحد عاوز يبنى مستقبله ويتجوز
    وكتير
    ربنا يتولانا برحمته

    joker

  16. moory-mero says:
    ٢٠‏/٩‏/٢٠٠٨، ٢:٥٢ ص

    السلام عليكم ورحمة الله وبركاته

    ولا يهمك أنا بتابعكم عشان حبيت مدونتكم بجد ومتابعاها دايما ان شاء الله

    ربنا يوفقكم جميعا يارب

    في رعاية الله

  17. غير معرف Says:
    ٢٠‏/٩‏/٢٠٠٨، ٣:٢٤ ص

    ميروووو شكرا على زيارتك لينا تانى وطبعا نتمنى انك تكونى صديقه لينا اتشرفنا بمعرفتك

  18. moory-mero says:
    ٢٠‏/٩‏/٢٠٠٨، ٨:٣١ م

    السلام عليكم ورحمة الله وبركاته

    باربي يا قمر الشرف ليا أنا يا كميلة ربنا يكرمك يارب ويكرمكم كلكم انتم بجد تيم ورك حلو أوي ربنا يخليكوا لبعض وأنا يشرفني بجد اكون صديقتكم

    بس عايزاكم إنتم الثلاثة بليز تجاوبوا على التاج بتاعي عايزة أعرفكم أكتر لو موش يضايقكم

    وربنا يوفقكم يارب وبرده أنا هفضل في مدونتكم يا أجمل أخوات وأصدقاء


    آه نسيت أقول ميرسي للجوكر على كلامه الجميل في مدونتي بس عايزاك تجاوب برده التاج لا تجاوبوه كلكم هههههه هيييييه يارب يجاوبوا بقى :)
    دمتم بخير دايما يارب

    في رعاية الله

  19. غير معرف Says:
    ٢١‏/٩‏/٢٠٠٨، ١٠:٠٠ م

    فى خلال الثلاثين عاما الماضية تعرضت مصر الى حملة منظمة لنشر ثقافة الهزيمة - The Culture of Defeat - بين المصريين, فظهرت أمراض اجتماعية خطيرة عانى ومازال يعانى منها خمسة وتسعون بالمئة من هذا الشعب الكادح . فلقد تحولت مصر تدريجيا الى مجتمع الخمسة بالمئه وعدنا بخطى ثابته الى عصر ماقبل الثورة .. بل أسوء بكثير من مرحلة الاقطاع.

    هذه دراسة لمشاكل مصرالرئيسية قد أعددتها وتتناول كل مشاكلنا العامة والمستقاة من الواقع وطبقا للمعلومات المتاحة فى الداخل والخارج وسأنشرها تباعا وهى كالتالى:

    1- الانفجار السكانى .. وكيف أنها خدعة فيقولون أننا نتكاثر ولايوجد حل وأنها مشكلة مستعصية عن الحل.
    2- مشكلة الدخل القومى .. وكيف يسرقونه ويدعون أن هناك عجزا ولاأمل من خروجنا من مشكلة الديون .
    3- مشكلة تعمير مصر والتى يعيش سكانها على 4% من مساحتها.
    4 - العدالة الاجتماعية .. وأطفال الشوارع والذين يملكون كل شىء .
    5 - ضرورة الاتحاد مع السودان لتوفير الغذاء وحماية الأمن القومى المصرى.
    6 - رئيس مصر القادم .. شروطه ومواصفاته حتى ترجع مصر الى عهدها السابق كدولة لها وزن اقليمى عربيا وافريقيا.

    ارجو من كل من يقراء هذا ان يزور ( مقالات ثقافة الهزيمة ) فى هذا الرابط:

    http://www.ouregypt.us/culture/main.html

  20. moory-mero says:
    ٢٢‏/٩‏/٢٠٠٨، ١١:٤٢ م

    السلام عليكم و رحمة الله و بركاته

    باربي ليه موش جاوبتي ع التاج هنا يا كميلة بشكرك طبعا على اجابتك وزيارتك بس ياريت تخليه عندك التاج وتجاوبيه هنا عشان كله يعرفك اكتر

    وبعدين فين البوست الجديد بقى مستنياكم يا أجمل تيم

    وربنا يوفقكم يارب

    في رعاية الله