ازاله...ازاله



ثوانى اشرب حبه ميه ..... اصل موضوع النهارده مليان شويه و ع فكره الحكايه بجد فى شارع من الشوارع التجاريه اللى هيا بيبقى فيها ناس وقفين بيبيعوا و سوق يعنى ......فى ناس كتير بيعدوا كل يوم فى الاسواق اللى زى كده و بيشتروا ويمشوا ومحدش فكر انه يكتشف اد ايه الناس دى بتتعب وندخل فى الموضوع ع طول






الحكايه كان فى يوم ماشيين انا و صاحبى رايحين نشوف واحد صاحبنا بيشتغل فى الشارع التجارىلفظ ده احسن من السوق بالنسبالى ما علينا
و خير اللهم اجعله خير و كالعاده الشارع مليان بشر ... بس كان لازم نكافح انا وصاحبى لحد ما نوصل لصاحبنا اللى رايحين نشوفه ..ودخلنا ومش عارفين احنا حنوصل امتى بالتحديد ،زحمه بقى

وكنا اول مره نروحله ونشوفه وهو شغال و كنا كل اللى نعرفه انه شغال فى محل بتاع شنط الاطفال وحريمى و كده ، ووصلنا الحمد لله بعد مشوار طويل مع ان الشارع اصلا مش طويل اوى

المهم... روحنا وشفنا صاحبنا و طبعا النظره الاولى كانت غريبه الواد كان زى الفل و زى القشطه ايه اللى جراله و بهدله كده


و الحمد لله ربنا محرمنيش انى اشوف واعرف بنفسى هو ايه اللى بهدله






مره واحده لقينا حد بيقول """ ازاله ... ازاله"""، و فى ثانيه لقيت صاحبى بيشخط فيا وبيقولى لم بسرعه البضاعه احسن يخدوها... انا مش فاهم بالظبط؟؟؟ .. فسألت صاحبى اللى كان معايا من الاول فى الخباثه . فضحك وقالى لم وانت حتعرف بنفسك




و بالظبط دقيقه والشارع اللى مكناش عارفين نمشى فيه بقى فاضى طبعا لان الرصيف بقى فاضى و الناس طلعت تمشى ع الرصيف والعربيات مكنها الطبيعى ع الاسفلت فى الشارع


فسألت صاحبى وقولتله هما ليه شالوا الحاجه وعايزين ياخدوها ليه ...قالى بص وانت تعرف


فلقيت عربيه نص نقل صغيره اللى هيا البوكس بتاع البوليس الازرق ده ، ونازل منها من ورا جوز عساكر معصعاصين ، وقاعد قدام ظابط بس ايه عليه هيبه و عليه وش شبهه عشماوى عايش الدور بقى


ووراهم عربيه نص نقل كبيره بتلم البضاعه بتاعت البياعين و ايه كله ع بعضه وارمى يا معلم ... وطبعا كنت واقف اتفرج وانا مصدوم ومش قادر اعمل حاجه ... ولقيت صاحبنا اللى بيشتغل فى المكان بعد ما لم البضاعه وتواها


بيبصلى وبيضحك وبيقولى انت لسه شوفت حاجه دول بيعدوا فى اليوم بتاع خمس ست مرات كده وفى كل مره بنلم البضاعه زى ما انت شايف ونرجع نرجعها مكانها اول ما يمشوا

وفعلا اول ما الظابط واللى معاه مشوا ، لقيتهم بيرجعوا البضاعه زى ما كانت ، و الشارع رجع زحمه تانى كل ده فى دقيقه ... سبحان الله

و على كده صاحبنا ده طالب فى كليه الحقوق ... حقوق هئ هئ هئ هئ هئ


الخلاصه من الموضوع ده ان الحكومه مش موفره شغل للناس علشان يشتغلوه وكمان بتحاربهم فى اكل عيشهم وبتهدملهم مكان شغلهم المؤقت طبعا



طالما الحكومه خايفه اوى ع الشارع وعايزاه يبقى فاضى وجميل قال يعنى البلد كلها جميله ومفيش غير الشوارع التجاريه



توفر للبياعين دول اماكن يبيعوا ويشتروا براحتهم ويبقى مكان ثابت لهم ... ياله الحمد لله



الظاهر ان مصر حتفضل عمرها بلد البطاله و حتفضل المشكله موجوده طول ما المعامله دى موجوده




و يبقى السؤال بعد ما البضاعه دى اتلمت واخدوها البلويس ؟بتروح فين؟؟؟؟؟؟؟؟؟؟؟





كتب لكم / واحد مخه لاسع شويه


  • Digg
  • Del.icio.us
  • StumbleUpon
  • Reddit
  • Twitter
  • RSS

10 Response to "ازاله...ازاله"

  1. Ranoosh says:
    6‏/9‏/2007 11:28 م

    سؤالك في الآخر جه على بالي وانا باقرا الموضوع وميزة الكلام ده انه بيظهر لنا حاجات بنشوفها كل يوم وبنعتبرها عادية لكن في الحقيقة هي وراها مشاكل كتيرة وحياة ناس كان الله في عونهم

  2. شبــ اون لاين ـــاب says:
    7‏/9‏/2007 1:40 م

    ranoosh


    شكرا ع مرورك

    المشكله ان الحكايه يوم بعد يوم بتكبر ومحدش بيقدر يعمل حاجه لحد ما حيجى اليوم اللى الناس حتسرق بعض و ممكن توصل لحد القتل علشان يعيشوا


    تحياتى
    :)

  3. dr.Roufy says:
    9‏/9‏/2007 8:41 ص

    أنا كمان بافكر في سؤالك الأخير كل ما اشوف المنظر دا

    ساعات أقول يعني الناس دي مطلوب منهم يعملوا ايه..يسرقوا مثلا..ولا يشحتوا

    مش عارفة بس أكيد لازم يكون في طريقة غير كدا للحل

    احنا بنتكلم هنا عنهم بهدوء..لكن هما حاجات زي دي بتهد بيوتهم..وتدمر أسرهم

    بجد شئ مؤسف

  4. شبــ اون لاين ـــاب says:
    9‏/9‏/2007 7:35 م

    dr:roufy

    شكرا ع زيارتك لينا

    المشكله بعد كده تلاقى الناس بعد كده ميلاقوش فلوش علشان تعيشوا بيها ... ف الحل الاسهل انهم يسرقوا

    ربنا معاهم ومعانا ... لاننا احنا ف الاخر اللى بنتسرق

  5. ~ Bato0ot ~ says:
    9‏/9‏/2007 9:37 م

    ana bardo geh fe demaghy y3ni el7agat de btrou7 fen ... mmmm
    betetseref mokf2at y3ni wala eh :S

  6. نهر الحب says:
    10‏/9‏/2007 2:47 م

    متشكره جدا علي كلاك عندي من غير استاذان انت تامر

    وتنورني في كل وقت

    اما عن الموضوع
    انا ضد فكرة الازاله تماما
    لا الناس دول غلابه مش احسن ما يسرقوا

    بص البلد دي مش بتقدر غير علي الغلابه

  7. شبــ اون لاين ـــاب says:
    10‏/9‏/2007 5:25 م

    bato0ot

    شكرا ع زيارتك لينا

    و انا بصراحه نفسى الاقى للسؤال ده اجابه بس انا حاسس انى مش حلاقى حل خاااالص


    تحياتنا

  8. شبــ اون لاين ـــاب says:
    10‏/9‏/2007 5:30 م

    نهر الحب


    شكر للزياره و نرضهالك فى الافراح


    و الحكومه مقدرتش ع الحمار حتتشطر ع .....؟؟

    وربنا يرحمنا


    تحياتنا

  9. Bossy says:
    13‏/9‏/2007 1:36 ص

    السلام عليكم


    والله الموضوع دا بيخليني حزينه جدا خصوصا انها بتتكرر كتير
    وبجد الناس دي غلابه اوي
    بس هنعمل ايه
    حسبي الله ونعم الوكيل


    فكره انكم جروب وتفكيركم متشابه ومتفقين شئ جميل
    ربنا يوفقكم

    وكل سنه وانتم طيبين
    ورمضان كريم

  10. شبــ اون لاين ـــاب says:
    13‏/9‏/2007 2:06 ص

    bossy

    بجد اننا تعبنا من كتر التفكير فيه بس حنعمل ايه ... دى حكومه بقى


    و شكرا ع الكلام الجميل ده ربنا يخليكى


    و كل سنه وانتى طيبه